ឈើប្រណិតជិត២០ដុំដែលឈ្មួញលាក់ទុកក្នុងដីចម្ការដូងមួយកន្លែង ត្រូវបានសមត្ថកិច្ចខេត្តកំពង់ស្ពឺរឹបអូស
កំពង់ស្ពឺ៖ ឈើប្រភេទសុក្រំចំនួន ១៨ដុំដែលឈ្មួញលួចដឹកមកលាក់ទុកនៅក្នុងដីចម្ការមួយកន្លែងដែលស្ថិតក្នុងភូមិត្រពាំងប្រិយ៍ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ត្រូវបានសមត្ថកិច្ចបង្រ្កាបបាននៅថ្ងៃទី២៤ ខែវិច្ឆិកា ឆ្នាំ២០២២។
មុនឈានដល់ការបង្រ្កាបបានប្រភេទឈើដ៏ប្រណិតជិត២០ដុំនេះ សមត្ថកិច្ចបានស្រាវជ្រាវរកឃើញទីតាំងលាក់ទុកឈើ ប៉ុន្តែឈ្មួញដឹកឈើបានរត់គេចខ្លួនមុន ដោយរឹបអូសបានតែឈើ។ តែយ៉ាងណា សមត្ថកិច្ចកំពុងតែបន្តស្រាវជ្រាវរកអត្តសញ្ញាណជន មេក្លោង និងអ្នកទទួលខុសត្រូវ។
ឈើទាំងអស់នោះបច្ចុប្បន្នសមត្ថកិច្ចមិនទាន់វាស់វែងនៅឡើយទេ ដោយបានដឹកជញ្ជូនយកមករក្សាទុកបណ្ដោះអាសន្ននៅស្នាក់ការបរិស្ថានចំបក់ ក្នុងឧទ្យានជាតិព្រះកុសុមៈគីរីរម្យ ដើម្បីបន្តនីតិវិធី។
គូសបញ្ជាក់ថា រាល់ឈើដែលរឹបអូសបានពីបទល្មើសព្រៃឈើ ត្រូវបានរាជរដ្ឋាភិបាលដាក់ឱ្យដេញថ្លៃ និងលក់ឡៃឡុង ដោយថវិកាដែលទទួលបានពីការលក់ឈើនោះ នឹងត្រូវប្រគល់ជូនរដ្ឋ៕
